精誠所至 金石為開？

今日再同mingmanfred一味多食。改為「多寫」，假如有人想玩埋一份。

話說大約一個月前，我發了一條Plurk說「很多事情，努力是沒用的」，反應頗為熱烈（自認為）。贊成者說「努力沒有一點意義」、「努力只是用來安慰別人的廢話」、「努力過也得不到，旁人卻不用努力便垂手可得」、「成功和努力根本沒有關聯」，反對者說「不努力一定沒有好結果」、「只要肯努力，得到的將會可能比別人多」、「沒努力的話，一定不會成功」。

我只能說，除了學習，沒有什麼事情努力一定有回報的。

例如說A鍾意B，B唔鍾意A，咁A努力博取B歡心，B係咪就會鍾意A？個人認為通常都唔會，但如果B是女的，成功機會會比B是男的高。

女人會因為有個人對佢好而感動，男人比較嚮往得不到的，對佢好盞佢以為老馮。

曾經聽過一個理論，話女人在愛情中要做壞女人，如果做好女人，照顧得男人太好，佢會搞錯以為你係佢阿媽，幫佢做好晒家頭細務。所以都係做壞女人好，等男人服侍好過。

畢打自己人第168集就有一個活生生例子。郭少芸覺得Ben少好蠢，剛巧被Ben少誤會佢有愛滋，佢仲諗住咁樣可以擊退佢，唔駛煩。點知反而Ben少對佢更好，千里迢迢買佢鍾意食的豆腐花，仲應承對佢不離不棄，鐵石心腸的郭少芸都被佢感動到開始鍾意佢（畢打自己人第168集劇情簡介）。

我反對努力論唔係想悲觀，不過現實始終是現實，認清也好，免得希望越大，失望越大。

延伸閱讀：精誠所至　金石為開 by mingmanfred

Who Am I?

今日同mingmanfred玩一題兩寫，題目係：應否改變自己投情人所好。

講到經典，我會揀Sex and the City的Charlotte。Charlotte為了和愛人Henry一齊，不惜學習猶太人的傳統禮儀，放棄自己的種族，加入猶太族裔。睇住佢過婚前最後一個聖誕那一幕真係戥佢難過，佢儲儲埋的聖誕裝飾都要丟掉了。不過好好彩，最終佢都無揀錯人，夫妻恩愛，如膠似漆。

不過電視劇始終是電視劇，這套甚至有點童話。現實中，如果你有一些特性係伴侶唔能夠容忍，你會點辦呢？這裡說的不一定是缺點，可以係習慣、喜好。要改？還是叫對方容忍？如果對方話忍無可忍，唔改就散，咁點算好呢？

近來在羈翔處看到個典型例子：未婚妻禁止未婚夫在新居擺放模型和動漫玩具，以免失禮。（原文：開心價）

老實講，我好同情這位男士，而且這個只是開始，之後仲有成世人對住（如果無離婚），興趣這回事有得改嗎？

舊同事陳生曾經同我分享他的戀愛經驗談。佢話通常人剛開始拍拖必定想將自己最好的一面俾對方睇，外表執到最正，缺點壞習慣不要給對方發現。佢話經過多次失敗之後，佢發現錯就錯在開始時無俾對方知道自己的問題，到後來被對方發現對方就話分手。終於佢決定一開始就要將自己真正的一面表露無遺，而且亦到成功娶到阿嫂。

大家也應該曾聽聞，日本韓國的女士要比丈夫早起身，在丈夫起身前化好妝。唔知道事實係咪真係咁，但如果在伴侶面前也要做足全副武裝，連真實一面都要收埋，就真係好恐怖。照計化妝同唔化妝唔會差好遠o者，我唔信世界上有一種化妝方法可以將醜女變美女，美化極也不會改變成個樣吧？

好啦，講來講去，我其實想話我覺得無可能為了一個自己鍾意的人改變自己，或者嚴格來說，係可以改變程度，但不能完全改掉。愛情係好偉大，為一個人改變自己係好偉大，但能夠堅持幾耐呢？最重要的問題係，咁做係咪真係對雙方最好呢？

好似以上例子咁，如果我是那位男士，我會爭取保留部分心頭好。如果伴侶對你的喜好表示厭棄，我覺得：親愛的，那不是愛情。難保他朝佢會厭棄你其他特質，甚至厭棄你。與其係咁，你叫佢買個吹氣公仔好了，擔保可以任佢搓圓按扁。



延伸閱讀：Who am I by mingmanfred

　　　　　Who am I by 恭介兄

風塵三俠

唔知點解，最近我經常想起這齣戲。

電影圍繞梁朝偉、梁家輝和鄭丹瑞三個男人的感情事，是當年一套少有叫好又叫座的電影。

我經常想起的是梁家輝一段。梁家輝是貪新鮮的男人，最愛一夜情，見到梁朝偉個妹朱茵又起痰，但其實佢背後有個女人－袁詠儀。每當梁家輝找不到女人過夜，就會電召（的確是電召）袁詠儀返屋企，袁詠儀就會帶埋湯水（包埋俾梁家輝的同屋主）上來。最嚇我一驚是（如果無記錯）袁詠儀脫掉乾濕褸就是內衣了，真方便梁家輝。然後做完便回家，也不留宿。

你可以說是「一個願打，一個願捱」。不過有一天，袁詠儀說有個男人話要帶佢去外國（唔知點解做戲成日有咩事就話去外國，乜真係咁易咩？），我依稀記得她幽幽的語氣，梁家輝只說「咪好囉」諸如此類，就像袁詠儀和其他一夜情對象一樣有性無愛。後來佢終於醒覺原來袁詠儀先係佢最愛的人，但已經太遲了。

人生哲理很多人識講，不過會不會做，做不做到又是另一回事。好似這個故事咁，袁詠儀固然慘，梁家輝更抵死（真對不起梁家輝和袁詠儀，我只是說那兩個角色啦）。這個世界沒有什麼是理所當然的，有人對你好不是必然，不要因為習慣了就以為可以點都得。感情即使不是等價交換，也一定要有來有往才能維繫。

當然你可以選擇做梁家輝或袁詠儀，最緊要係你玩得起。

愁人節

情人節一個人過不是最老土，最老土是有一班有伴侶的人說這說那，忙著給單身人士愛情貼士。

（以下絕不是發老脾，而是實在看不過眼，不喜歡就不要睇>.<）

完全明白有些有伴侶的人眼見其他人孤家寡人，同情也來不切，禁不住要向單身人士教路。

在此謹代表所有單身人士向這班人說句多謝，但我實在好想大聲代表自己說句：「NO！」

也許「有伴侶」比「單身」幸福，不過有時純粹是個人選擇，你說拖著個不愛的幸福還是單身幸福？

上述這種愛情貼士最可惡的就是將矛頭指向女生，好像女生單身就是她有問題，男生單身就唔關佢事。

香港女多男少，但不代表女生單身就是她的錯吧？駛唔駛寫篇七宗罪列舉女生的錯？

你挑剔，你眼角高，你不主動，你扮高竇，你不去開拓社交空間…Blah Blah Blah，數得快哉。

我從來不是女權主義者，也實在支持不住這些人的憐憫同情了！我直頭想反同情他們善心泛濫了！

要是善心泛濫，大可以去捐款、做義工，這個世界太多人需要幫助了！

談戀愛、分手、結婚、離婚，莫不是人生階段。

成功固然需要努力，運氣也是一個很重要的元素。

我不想詛咒別人，但一個人的命運是好是壞，不蓋棺都不能下定論。

很多單身人士不是未拍過拖，只是暫時休息，駛唔駛一班三姑六婆指指點點，接受道德審判呢？

求求你！這些好心人自己搞掂自己咪好囉！不要再將自己的幸福建立在別人的痛苦身上。

願普天下有情人無情人的都情人節快樂！