我鍾意梁朝偉，鍾意金城武，鍾意吳宇森，加上睇了第一集，無理由唔睇第二集。
不過睇完真係有點失望。一套戲好唔好睇有好多因素，唔一定可以用計數機計出來。
毫無疑問，上一集文戲太多，未能滿足觀眾的期望，尤其不知道原來有下集的。但最少有台型。
基於大眾對上一集諸多批評，電影公司都唔可以唔作出改變，尤其製作費已經超支。
但係戲已經拍完啦，可以改的只是後期製作，無理由諗住套戲可以改過換面。
結果套戲剪出來，表面上劇情好似緊湊了，打鬥好似一浪接一浪。實際上劇情無好好編排，反而更見鬆散。
籌備「火燒連環船」終極一戰搞了成個鐘，中間唔係有角色交待下戰事進展，單憑畫面真係唔知打成點。
一幕與一幕之間的轉折位，以刀劃破布來表示，感覺好肉酸，趕頭趕命咁，無理由142分鐘都唔夠用呀嗎？
若然真係太多情節，不如刪減一些支節，顧全大局會更好。
只可以話赤壁是吳宇森罕有的失敗之作。或者照返上集咁剪，未必得到大眾認同，但就夠統一、夠完整。
一向很喜歡梁朝偉，但我也不會否認梁朝偉拍赤壁，效果真的好一般。
我好同情佢，一開始佢就話唔拍，後來發哥唔拍佢先出來捱義氣。
睇佢舞刀弄劍真的好怪，一點也不瀟洒，加上國語配音…似乎佢做動作片真係唔得，拍東京攻略已是極限。
金城武是全片最討好的。以前一直覺得佢個樣好現代，但可能因為是混血兒？又OK喎，而且佢又好搞笑。
張豐毅演曹操又笨又鹹濕，見到林志玲即刻中計，還是太過自信？對白設計又太過低能，差在未親口話自己蠢。
林志玲今集的表現好多了，當然也不能有什麼期望，但總算符合一個花瓶的標準。
但吳大導未免太偏心林志玲，趙薇話晒都係女配角，看來比梁朝偉、胡軍更老，似張震個家姐多些。
由於今集集中講打將，其餘一干人等戲份大量刪減，演得是不錯，但都變成大茄，發揮機會近乎零。
對白設計聽來也有不少問題。也許內地觀眾中文水平不俗，我等凡人不斷的聽吟詩作對實在很頭痛。
除了張豐毅的對白顯得他很笨之外，中村獅童多次說「無問題」，我好懷疑到底古人會唔會咁講呢？
結局也完場得好倉促，兩個男角個頭拱到咁埋，我差點擔心他們會咀咀。
全片較為欣賞的是趙薇與蹴踘小將一段疑幻疑真的感情，雖然刪剪了也不影響大局。唔知那個男角是否名演員？
總括來說，如果十分是滿分，上集是六分，今集是五分，但喜歡看戰爭場面的朋友不妨一看。
