自從旅行回來…不，其實是自從我準備南台灣之旅，到臨出發前幾天也未訂好行程開始，我便停止了一些良好習慣。所謂良好習慣，包括做Gym（雖然做了也沒有瘦，但一定好過唔做）、踩健身單車（搞到我無得睇One Piece）同早返工（其實唔係早到，只係遲到唔超過15分鐘）。
咩話？早返工都係良好習慣？我不是很討厭早起身，仲要因為返工嗎？我喜歡遲到，喜歡準時走，但我不喜歡在遲到期間發生了事，入了Job，入了Email，而我遲到回來要一下子應付很多東西，因為早餐是很重要的，我盡量都會慢慢食完早餐先開工，遲到會破壞我的早餐大計，那比侵略地球更重要啊！
沒有了良好習慣不特止，我更養成了壞習慣。從台灣回來後返工，可能體力透支，抵抗力下降，無耐便感冒了。星期一下晝起，星期四朝頂唔住去睇醫生。自此經常口淡淡，加上工作苦悶（工作繁忙都可以悶），成日食個不停，尤其食多了麵飽，個胃頂住，終於尋日我覺得消化不良了，直到現在（鬼咩，仲係咁食個不停）。
其他還有不修邊幅，不務正業，不事生產，總之就係懶。阿媽星期日生我，點解？因為我懶囉，所以要揀個休息日出世，所以我天生就是懶，無辦法，我都唔想，最衰我阿媽（聽講你夜晚八點幾出世，咁好快D訓覺第日返工囉）。
我已經安排了今個星期六日一些節目，否則又會像上星期六咁訓了26小時，枉過一個大好星期六。我要起身，要出街，要Relax，要郁動，要見人。為此，我有份工作聽日要完成，我剛才12點放工。是呀！我自己都覺得好變態，我好耐都無試過咁夜放工了。
唔係喎，諗諗下，我兩年前依然過這樣的生活，兩年前更是我人生的癲，呀唔係，係巔峰。兩年前的一個星期，我一個星期裡面任何鐘數都返過了，有時朝早未走，客戶日班的同事打來係我聽，都會話：「吓？點解你o係度？未走？」客戶的人也知我辛苦，反而公司也沒說什麼，所以我好快走了。
但變態的不是我夜收工，更恐怖的是我一個人搭Lift到樓下，因為前門關了，要經停車場從後面走，途中有一段窄路，彎位有個直立式煙灰缸，我唔記得連唔連垃圾桶，尤其因為有個男人企響度遮住，個男人無著制服，衣著Casual，大概廿幾三十，點解大概？因為佢背住我，佢向住個煙灰缸，手部有些動作。
我以為自己聽到了水聲，會不會是妄想症發作？想了不足0.01秒，我維持我的貓步靜靜走過。過後我想，如果那時我發出聲音，可能會大開眼界，看到不想看的東西；更不幸的話（大佬，今日黑色星期五），可能衣服會被弄髒，Shit！
話時話，今日返工，我見到有個地方填名字的，但有人填上了姓氏，而這個姓氏讓我想起了火羽和這首歌：
">
其實陳百強D歌都幾好聽呀，但係我細個唔識欣賞，覺得佢同阿倫的唱法好唔似，而年少無知的我以為阿倫的唱法才是正統，陳百強唱起歌來同說話差不多，大個反而先識欣賞，所以人在不同年紀，睇o野都會唔一樣。當年我仲曾經煩惱到底鍾意阿倫定張國榮好，唉，真離譜！雖然確實譚詠麟的歌好好聽，抄歌詞都抄死我。
返到屋企咁夜了，點解我都仲要寫Blog？本來諗住隨便寫一些便沖涼去訓，結果寫呀寫，寫到而家做經典粵語長片了，我還喋喋不休。明明我無飲酒，點解會醉？是未病好，還是其他病？要去複診嗎？醫生，我…口淡淡啊！有咩美食俾我食？
