出乎意料之外，這套戲的票房比「翻生侏羅館2」差，似乎大家對達文西密碼電影版猶有餘悸。
我對這套戲無乜期望，而且亦無睇原著，只係期望睇下風景（係咪好過份），所以覺得OK。
基本上全套戲都是達文西密碼的翻版，所有元素都一樣，解謎、宗教、人性、景點一網打盡。
劇本無新意，相信原著即使有精彩之處，也在濃縮改編之下刪掉了。
不過局部總算緊張刺激，至於猜謎，普通觀眾只有聽解說的份兒。
湯漢斯的表現無達文西密碼咁突兀，感覺出場無達文西密碼咁多，表現機會少了。
女主角年紀明顯比Audrey Tautou大一截，配合返其他角色，睇睇下都幾靚。
雖然這套戲的演員都比較弱，但唔緊要，一個伊雲麥葵格加了不少分數。
伊雲麥葵格的表現可以話無懈可擊，一行出來已經成個Father咁，難怪火羽話要入教！
比較驚喜的是睇一眾宗教人士爭權奪利，也許正如片尾說：「主教也是人。」（有無記錯？）
雖然我都傾向相信科學，相信自己，不過戲中有關信仰的討論亦值得回味。
片長139分鐘，我覺得無乜冷場，但不少人或者因為片長忍不住去廁所。
梵蒂岡的風景可謂精彩絕倫，那些教堂，那些角度，即使親身去都未必睇到咁靚。
據聞原著的物理理論篇幅又深又長，電影用畫面化繁為簡，所以電影版也有其優勝之處。
反物質空中爆破一段很震憾，亦令我細想萬一發生這種事，我希望能夠和親愛的人拖著手渡過。
