因為有一張生日贈券睇戲，因為經過戲院睇戲，因為想食爆谷睇戲，因為想睇戲睇戲。
但點解係「神探伽俐略」？明明平時都無追開電視劇，開著都唔睇，總係覺得一般。
電視台剛播完劇集又播SP，搞到鬼咁多人入場，這個推銷策略可謂成功了！
入場其實係因為想知男女主角之間的結局。結果被騙了，完全無提，呃錢！
也許大家都睇了我個舊Blog好一段時間，但唔講唔知，其實我係好鍾意睇偵探故事的。
尤其自己可以估下誰是兇手，最尾又估中的話，呵呵呵！
所以當無份參與時，多少有點悶。例如這套戲，一開始已經講了誰是兇手，只是要查掩飾手法。
開頭都OK的，但去到中段節奏慢下來，望下表，竟然做了一半我就睇表，尾段未免太拖戲了。
而且也並非無犯駁之處，例如我唔明點解那個露宿者會肯幫忙，不覺得怪嗎？只是為了錢？
電影的焦點當然是福山雅治。曾經有男同事問佢咁受歡迎，係咪剪這個髮型就得？
我答錯錯錯！！！佢受歡迎，主要原因係「同一屋簷下」的二哥角色太深情！和這個髮型無關。
勉強只可以話佢39歲個樣同身型都Keep得唔錯。但我仍然只是喜歡二哥，始終歲月無情！
福山雅治的演藝生涯中，其實以唱歌為主，拍戲拍劇其實唔算多。這套戲的音樂佢都有份做。
雖說他的演戲經驗不算豐富，他的音樂我都不特別喜歡，但今次的演出著實不錯呢！
一來沒有太扮型，而且演出內歛，配合返佢個角色－有冷靜頭腦的科學家。
相比之下，演戲經驗豐富的堤真一，老實講有點說不過去。
例如有個位他激動嚎哭，但觀眾卻笑起來，明明應該很深情，但做不到這個效果！我只能搖頭。
我無睇過他在「Good Luck」的演出，但他在「Hero SP」也不錯呢！不過都是做木獨佬。
至於女主角柴咲幸，其實我好戥佢可憐的，佢家陣只有27歲，點解成日要配熟男？
雖然佢塊面有點大有點扁，但眼睛很好看。可能係佢個外型太硬朗，局限了她的戲路。
翻查資料，原來柴畸幸參演的第一套電影不是「大逃殺」或「大暴走」，而是「東京攻略」。
唉，我掛住睇梁朝偉，仲邊得閒睇佢身邊的美女助手？
她在「神探伽俐略」飾演的女警探雖然一腔熱誠，卻被人批評為白痴的花瓶，我很替她不值。
根本她的角色是用來陪襯湯川教授，無個蠢人問東問西，湯川教授唔通捉住佢個部下解釋咩？
另外片中的她身為唯一的女警，還要被男上司點去沖咖啡，日本女性的職場地位真卑微呢！
她這個角色在原著中是沒有的，原著的警察都是草薙，飾演的是北村一輝。
認識北村一輝是早排星期日朝播的「料理新鮮人」，好喜歡他啊！總是笑咪咪、風度翩翩！
然後先發覺原來佢有做「神探伽俐略」和「14歲媽媽」，短髮的他看來很清爽呢！
不過他在電影版中的演出也不算多，有興趣大家還是看沒有柴咲幸的SP版好了。
最後要講松雪泰子。吓？這個不是「爆粗Band友」裡面的變態經理人嗎？怎麼變得我見猶憐呢？
我只能心悅誠服說句，這就是演技了！綜觀全套戲，她的演出較多層次、較細膩，能引起同情。
要問我咁睇唔睇好呢？我會話你鍾意電視版的應該都會鍾意，否則都唔駛刻意入場。
P.S.另外想補充一下，睇戲途中聽到鄰座觀眾提到「乞兒」。
我去日本時，導遊說過，日本是無乞兒的，那些只是露宿者，有些甚至年紀很小。
